Pogradeci ka bërë goditjen e dytë të merkatos brenda ditës së sotme, duke afruar në skuadër një emër të njohur për futbollin shqiptar për shkak të lidhjes familjare. Bëhet fjalë për Oni Patushin, djalin e ish-mesfushorit të njohur matjan Sajmir Patushi, i cili ka spikatur në vitet 2000 me fanellën e Tiranës, Vllaznisë dhe ekipe të tjera të Kategorisë Superiore.
19-vjeçari luan si mesfushor krahu dhe ka qenë pjesë e akademisë së Tiranës, ku është formuar profesionalisht. Transferimi i tij te skuadra liqenore shihet si një hap i rëndësishëm për karrierën e tij, ndërsa klubi ka konfirmuar lajmin nëpërmjet një postimi në rrjetet sociale.
“MIRË SE ERDHE! Oni Patushi, 19 vjeç, mesfushor krahu, është afrimi më i ri në ekipin e liqenorëve. Suksese në vazhdim”, shkruhet në njoftimin e Pogradecit.
Ky është një rast ku historia dhe pasioni për futbollin vazhdon nga babai te i biri, me shpresën që Oni të ndjekë gjurmët e suksesit të Sajmir Patushit në fushën e blertë.
Discussion about this post