Kapiteni i Kombëtares dhe mbrojtësi i Empolit, Ardian Ismajli është ndër emrat e preferuar në tregun e transferimeve.
‘La Repubblica’ shkruan për interesimin e Napolit, me mbrojtësin që ka pasur një sezon të mirë deri më tani. Qendërmbrojtësi shqiptar në ndeshjen e fundit mes dy skuadrave, la përshtypje të mirë, duke mbuluar si duhet Romelu Lukakun dhe ngjallur kureshtjen e drejtuesve napolitantë, të cilët kërkojnë një element për të forcuar prapavijën në merkaton e janarit.
Sipas raportimeve, lojtari do të zëvendësonte Juan Jesus, koha e lojës së të cilit është gjithnjë e më e pakët dhe aventura e të cilit në Napoli duket se ka marrë fund.
Për Ismajlin ka interes edhe nga Juventus, ndërsa janar duket se do e gjejë mbrojtësin me një ekip të ri. Te Napoli ai do gjente edhe Amir Rrahmanin, kapitenin e Kosovës.
Discussion about this post