Kancelarja gjermane Angela Merkel nis sot turin e takimeve në Ballkanin Perëndimor. Në orën 16:00, Merkel mbërrin në aeroportin “Nikola Tesla” në Beograd dhe bashkë me delegacionin që e shoqëron do të nisen drejt pritjes solemne me nderimet më të larta shtetërore që do t’u bëhet para pallatit “Serbia”.
Më pas, presidenti Aleksandër Vuçiç dhe kancelarja do të bisedojnë privatisht, për të dalë më pas në një deklaratë për mediat. Merkel do të takohet me përfaqësues të shoqërisë civile nga i gjithë Ballkani, gjë që nuk është e pazakontë, duke pasur parasysh se takimet me sektorët joqeveritarë janë praktikë e saj.
Ish -kryeministri i Serbisë, Nikola Sainoviç thekson se për median serbe “Blic”: “Dikush kaq i rëndësishëm vjen në Beograd në fund të një karriere kaq të madhe, që do të thotë se ajo e respekton Beogradin. Kosova gjithashtu do të jetë një temë e pashmangshme, në të cilën ne nuk jemi dakord, por në mesin e partnerëve seriozë nuk është një herezi. Në fund, unë mendoj se kjo bisedë do të lërë një gjurmë dhe një rrugë për komunikimin e ardhshëm me qeverinë gjermane, cilido që të jetë pasuesi i saj.”
Diplomati Zoran Milivojević e vlerëson takimin midis Merkel dhe Vuçiç si synimin e kancelares për të lënë Ballkanin Perëndimor “si një trashëgimi” për pasardhësin e saj në fund të mandatit dhe karrierës së tij politike. “Nuk është rastësi që ajo do të jetë në Beograd veç e veç, dhe më pas në Tiranë me të tjerët. Këto janë mesazhe plotësisht të qarta se Gjermania ka interes në këtë fushë”, -tha ai.
Pas përfundimit të takimeve në Serbi, kancelarja Merkel niset për në Shqipëri, ku edhe do të zhvillojë takime me zyrtarë shqiptarë, ndërsa do të darkojë privatisht me të gjithë liderët e rajonit, pa Serbinë.
