Këshilli i ri Drejtues i Radio Televizionit Shqiptar, i cili u miratua më 17 Mars në Kuvend pas një marrëveshje mes PS-së dhe PD-së, ka zhvilluar këtë të mërkurë mbledhjen e parë.
Mbledhja është drejtuar nga Fatjon Hoxhalli, i cili u miratua si kryetar i Këshillit, teksa para kësaj detyre mbante postin e këshilltarit të grupit parlamentar të PS-së dhe më herët këshilltar për mediat i Niko Peleshit gjatë detyrave të tij në Qeveri si zëvendëskryeministër e ministër.
Gjatë mbledhjes së sotme është diskutuar dhe është rënë dakord për të gjitha pikat e rendit të ditë. Fillimisht Këshilli Drejtues është njohur me aktet e parlamentit për mandatin e gjithsecilit dhe më pas është votuar për nënkryetarin,
Në mënyrë unanime, duke marrë 10 vota pro, si nënkryetar i Këshillit është zgjedhur Petrit Beci.
Gjithashtum, raportohet se është diskutuar edhe për pjesëmarrjen e Shqipërisë në Festivalin Europian të Këngës, që mbahet në datat 13–17 maj në Bazel të Zvicrës.
Për shkak të afateve të përcaktuara nga organizatorët e Eurosong, anëtarët u dakordësuan që të thërrasin një mbledhje tjetër brenda kësaj jave për të vijuar me procedurat e nevojshme. Shqipëria do të përfaqësohet nga grupi “Shkodra Elektronike” me këngën “Zjerm”, me të cilën fituan edhe Festivalin 63 të Këngës në RTSH.
Në këtë mbledhje të parë, Këshilli Drejtues ka propozuar edhe ngritjen e një grupi pune për hartimin e një procedure të standardizuar për përzgjedhjen e Drejtorit të Përgjithshëm sipas përcaktimit ligjor të Statutit të RTSH.
Kujtojmë se aktivistët për mbrojtjen e lirisë së media kanë ngritur shqetësimin se një pjesë e anëtarëve të rinj të Këshillit Drejtues të RTSH-së kanë një karrierë të lidhur ngushtë me politikën, pasi kanë mbajtur poste në Qeveri apo parti.
Discussion about this post