Merr flakë banesa në Gjirokastër, evakuohen banorët e pallatit

Një banesë në një pallat në Gjirokastër është përfshirë nga flakët. Autoritetet njoftojnë se kanë nisur evakuimin e banorëve. Paraprakisht, nuk raportohet për persona të lënduar.

“Në katin e tretë të një pallati në lagjen ‘18 shtatori’, dyshohet për shkak të një shkëndije elektrike ka rënë zjarr në banesën e shtetasit  R.K. Në vendngjarje kanë shkuar forcat e Policisë dhe po kryejnë  evakuimin  e banorëve të pallatit. Shërbimet zjarrfikëses po punojnë për shuarjen e zjarrit”, njofton policia.

Deri tani, sipas të njëjtave burime, nuk ka asnjë shtetas të lënduar apo me probleme nga tymi.

Grupi hetimor po punon për zbardhjen e plotë të rrethanave dhe dokumentimin ligjor të rastit, mbyllet njoftimi i bluve.