Pas 5 vitesh në kërkim, sot vrasësi famëkeq dhe i njohur Genc Tafili është arrestuar në Gjermani. Ai akuzohet për vrasjen e komisarit të policisë Arben Zylyftari në Shkodër, ngjarje e ndodhur në vitin 2000.
Tafili u lirua nga qelia me vendim të gjyqtares së Krujës Enkeleda Hoxha në 7 nëntor të vitit 2017, pas 17 vitesh pas hekurave për vrasjen e Zylyftarit.
Ai la qelinë kur i kishin mbetur edhe tetë vite pa kryer nga dënimi. Pas lirimit ai u largua nga Shqipëria. Por, në maj të 2021, Gjykata e Apelit në Tiranë rrëzoi vendimin e gjyqtares Enkelejda Hoxhës duke kërkuar rikthimin e tij në burg.
Genc Tafili, në nëntor të 2014 u akuzua se tentoi që të arratisej nga burgu i Peqinit, por u parandalua në kohë. Përkundër akuzave, Tafili mohoi se kishte në plan të linte qelitë e burgut. Ai dhe vëllai i tij Admir Tafili janë të dy emra shumë të njohur për drejtësinë shqiptare, të akuzuar dhe dënuar për disa vepra penale. Tafili disa kohë më parë është shprehur nga burgu në media që shteti nuk ka punuar asnjëherë për zbardhjen e ngjarjes së 2 gushtit të vitit 2000. “Shteti asnjëherë nuk u mundua të zbardhte ngjarjen që ne na shkatërroi si familje. Pse u soll drejtori i policisë në atë operacion për kapjen e babait tim, kur babai im lëvizte çdo ditë nëpër qytet. Ai dilte për peshkim, ku kishte biznesin dhe mund të kapej në çdo moment. Gjithçka ishte kurth për të vrarë Arben Zylyftarin. Ai më ka vrarë babën të dorëzuar dhe desh të më vriste dhe mua për të humbur gjurmët. Nuk kam shpresë te ky shtet. Ndoshta duhen të tjera viktima, këtë herë nga pala jonë, që shteti të vërë mend”, është shprehur Genc Tafili.
Discussion about this post