Prej disa ditësh ish-ministri i Brendshëm , Saimir Tahiri, ndodhet në burgun 313, pasi gjykata dha dënimin përfundimtar të tij. Ndërsa sot është vendosur që ai të transferohet në burgun e Fierit dhe të vuaj atje dënimin e tij me 3 vjet e 4 muaj burg. Dy ishin opsionet për Tahirin, burgu i Rrogozhinës dhe ai i Fierit, ku është vendosur për këtë të fundit.
Tahiri u dënua nga Apeli i GJKKO-së me 3 vite e 4 muaj heqje lirie, me akuzën e shpërdorimit të detyrës. Dënimi iu dha me 4 Shkurt, e që nga ajo ditë, Tahiri ka qëndruar në ambientet e paraburgimit te 313-ta në Tiranë. Ish-ministri qëndroi vetëm në një qeli në godinën numër 2. Ai ruhej nga forcat e policisë me të cilët shkëmbente edhe batuta.
Edhe pse ish-ministri kërkoi pafajsinë, sërish togat e zeza i konsideruan të forta provat kundër tij duke e dënuar me burg. Akuza e argumentuar nga Prokuroria ishte për përfshirjen e ish-ministrit në 4 episode trafikimi droge nga 2013-2015, por pa dhënë detaje për rolin konkret të tij. Beteja pritet që të vijojë sërish në Gjykatën e Lartë, por kësaj here ka një ndryshim, Tahiri nuk do të shkojë më si i pandehur, por si fajtor me pranga në duar në kërkim të lirisë.
Discussion about this post