Mbrëmjen e kaluar, në emisionin investigativ “Stop”, u transmetua denoncimi i një studenti i cili kishte thënë se ishte ngacmuar nga persona me prirje homoseksuale në zonën e Liqenit, mirëpo mënyra se si u përcoll historia, nuk është pritur mirë nga Aleanca LGBTI+ dhe Pro LGBT.
Sipas aleancës LGBT, gazetarët kanë shpërndarë mesazh për dhunë duke ju bërë thirrje qytetarëve të marrin armët dhe të pastrojnë qytetin nga njerëz që mund t’i përkasin këtij komuniteti.
‘’I bej një thirrje shumë qytetare, atyre të Rrugës “Bardhyl”, këtyre çunave që herë pas here dhe rrihen a vriten me njëri tjetrin. Nuk mundemi dot vetëm një javë të vetme ta kemi javën për të pastruar Tironën? Edhe, dilni si sportista me biçikleta a me patina knej nga këto rrugët, dilni dhe sistemoni edhe kthehuni prap në jetën tuaj rutinë. Është shumë vështirë me i dhën biçikletës me pistoletë në brez” -shprehet Saimir Kodra gjatë transmetimit televiziv.
Në një reagim për mediat të publikuar nga aktivistja për mbrojtjen e të drejtave të komunitetit LGBTI Xheni Karaj, moderatorët e emisionit Saimir Kodra dhe Gentian Zenelaj akuzohen se kanë kryer disa vepra penale, duke nxitur dhunë ndaj këtij komuniteti.
“Fjalitë cituara më sipër, pa asnjë ndryshim nga ato që u thanë në emisionin e djeshëm, janë thirrje të hapura për veprime të dhunshme dhe nxitje të urrejtjes nacionale që vendosin në rrezik paqen publike”– thuhet në reagim.
Sipas saj, kjo histori është manipuluar dhe tjetërsuar qëllimisht nga programi, teksa i bën thirrje autoriteteve që “të ndjekin me seriozitet maksimal rastin e fundit dhe të marrin vendime të drejta, duke dënuar çdo vepër penale, pa dallim autori.”
Gjithashtu, për këtë gjë ka reaguar edhe Elton Ilirjani, i cili ka reaguar ashpër ndaj gazetarit Saimir Kodra duke i bërë thirrje të gjithë aktivistëve të komunitetit LGBT në Shqipëri që të bojkotojnë çdo show apo bisedë derisa të kërkohet falje.
Discussion about this post