Ergys Mërtiri mbështet kandidimin e Lulzim Bashës për kryetar të PD-së zyrtare, në zgjedhjet e 29 korrikut.
Ai deklaroi në studion e emisionit “Të Paekspozuarit” se Basha është i vetmi që ka një projekt për të bërë një distancim të thellë nga e kaluara berishiste e PD-së.
“PD-së i duhet një distancim i thellë, i madh nga e kaluara berishiste. Se kush e bën këtë është në plan dytësor. Unë nuk shoh figurë tjetër që ta ketë më me seriozitet për ta bërë këtë. Shoh dy palë që po ndeshen nga krahu i Vulës, njëra që ka një numër më të madh deputetësh dhe këtë kërkon ta përdorë kundër grupit të Bashës për të marrë ajo trashëgiminë e vulës me shpresën se nesër mund ta bashkojnë me krahun e varesë, apo të Foltores. Pra ka një romantizëm jashtë realitetit. Ky grupi tjetër kërkon të mbajë karriket e veta që duket se janë lëkundur se nuk i kanë as të krahu i vulës dhe as të krahu i aspirantëve të vulës që është pjesa e Foltores.
Në këtë mes i vetmi që ka një projekt politik që i duhet Partisë Demokratike është Lulzim Basha, i cili, për interesin e vet, sigurisht, ka si frymë, si projekt, distancimin nga e kaluara berishiste, që për mua është gjëja më e rëndësishme që mund t’i ndodhë opozitës shqiptare në këtë periudhë”, tha Mërtiri.
Discussion about this post