Kancelari gjerman Friedrich Merz ka paralajmëruar se konflikti në Ukrainë mund të zgjasë shumë, duke theksuar se nuk shihen në horizont skenarë që do ta çonin luftën drejt përfundimit – as disfatë ushtarake dhe as lodhje ekonomike, si për Kievin dhe për Moskën.
Në një intervistë për transmetuesin ZDF, Merz tha: “Po përgatitem nga brenda që kjo luftë të zgjasë shumë. Po bëhen përpjekje diplomatike për ta mbyllur, por jo me çmimin e dorëzimit të Ukrainës”. Sipas tij, një dorëzim i tillë do të çonte në agresione të reja nga Rusia. “Dhe pastaj, pasnesër do të jemi ne. Kjo nuk është një mundësi”, shtoi ai.
Deklaratat e tij vijnë një ditë para afatit të vendosur nga Donald Trump për një takim mes presidentëve të Rusisë dhe Ukrainës, me qëllim hapjen e rrugës për negociata paqeje. Trump ka paralajmëruar “pasoja” nëse ky takim nuk ndodh.
Ndërkohë, Merz dhe presidenti francez Emmanuel Macron kanë fajësuar drejtpërdrejt presidentin rus Vladimir Putin për situatën dhe i kanë bërë thirrje SHBA-së të ashpërsojë sanksionet ndaj Moskës.
Merz shmangu përgjigjen për mundësinë e dërgimit të trupave gjermane në Ukrainë si pjesë e garancive të sigurisë.
Megjithatë, Britania dhe Franca janë duke shtyrë përpara një propozim për një “forcë parandaluese” kundër agresionit të mundshëm rus – ide që po shkakton debat në Gjermani për shkak të ndjeshmërisë historike.
Nga ana tjetër, Kremlini akuzoi vendet evropiane për sabotim të iniciativave paqësore të Trump dhe deklaroi se do të vazhdojë operacionin në Ukrainë derisa të ketë sinjale serioze se Kievi është i gatshëm për paqe.
Discussion about this post