Mes detit të trazuar për 12 orë, pasagjerët tregojnë tmerrin në traget: Fëmijët qanin…

Pas 12 orësh në detin e trazuar të Vlorës, 118 pasagjerët shqiptarë që ktheheshin nga Italia, tregojnë se udhëtimi ka qenë i vështirë.

Të lodhur dhe të frikësuar ata tregojnë se u është dashur të qëndrojnë më shumë se dhjetë orë në traget, ndërsa kompania nuk ka ofruar asgjë falas për të justifikuar situatën.

Ata tregojnë se nëse do të ishin njoftuar për kushtet atmosferike paraprakisht, nuk do të ishin nisur nga Italia, por kjo gjë nuk ndodhi dhe atyre u desh të paguajnë nga xhepi akomodimin prej më shumë se 10 orësh qëndrim në traget.

“E lodhshme, e mundimshme, e turpshme. Nuk na kishin lajmëruara, asnjë gjë absolutisht. I kemi paguar vetë, me kalamaj të vegjël. Nuk merr askush në konsideratë. Çfarë do na bënim vetëm të na vrisnin. Asnjë shpjegim, vetëm kushtet klimatike thoshin. Pritej vetëm vdekja sigurisht. Fëmijë të vegjël kishte që qanin”, është shprehur pasagjeri.

Njëri prej tyre madje ka treguar se një pjatë makarona kushtonte 15 euro, ndërkaq fëmijët e vegjël e kanë patur me të vështirë qëndrimin në mjetin lundrues dhe sipas tyre kanë filluar të qajnë.

“15 euro për një pjatë makarona, fëmijët qanin”, ka thënë një tjetër pasagjer.

Trageti i linjës Vlorë-Brindisi-Vlorë më 118 pasagjerë dhe një numër të konsiderueshëm automjetesh, kamionësh dhe autobusësh ka mundur të ankorohet pas 10 orësh në det të hapur.