Kryeministri në detyrë i Kosovës, Albin Kurti, nga Parisi ka deklaruar se Kosova ka luftuar korrupsionin dhe ka shënuar rritje të qëndrueshme ekonomike. Ai theksoi se vendi ka ndërtuar institucione demokratike të forta dhe po përgatitet për investime të mëdha zhvillimore
Në një kohë kur në Prishtinë ende nuk është formuar qeveria e re, dhe vendi përballet me pasiguri politike e buxhetore, Kryeministri në detyrë i Republikës së Kosovës, Albin Kurti përdori vizitën në Paris për të rikujtuar, siç tha ai, arritjet e qeverisjes së tij në këto vite.
“Kosova ka luftuar korrupsionin, ka zhvilluar institucione të forta demokratike dhe ka shënuar rritje të qëndrueshme ekonomike,” u shpreh Kurti, gajtë një diskutim në Institutin francez “Jacques Delors”, duke kujtuar se këtë verë, Fondi Monetar Ndërkombëtar dhe Banka Botërore e hoqën Kosovën nga lista e vendeve të brishta.
Me tej ai përmendi edhe politikat sociale që, sipas tij, kanë përmirësuar jetesën e qytetarëve përfshirë arsimin e lartë falas, shtesat për lehona e fëmijë, si dhe rritjen e pensioneve.
Ai theksoi se Kosova po përgatitet të mirëpresë Lojërat Mesdhetare 2030, për të cilat janë planifikuar investimet më të mëdha në infrastrukturën sportive në historinë e vendit.
Gjatë diskutimit, Kurti foli edhe për rëndësinë e sigurisë dhe mbrojtjes, duke nënvizuar se buxheti për Forcën e Sigurisë së Kosovës është rritur ndjeshëm, ndërsa bashkëpunimi me partnerët ndërkombëtarë po forcohet çdo ditë.
Në fund të fjalës së tij, Kurti tha se Kosova mbetet e përkushtuar ndaj reformave demokratike dhe integrimit evropian një mesazh që vjen në një moment politik të ndjeshëm për vendin, pas dështimit të tij për të siguruar një mandat të ri qeverisës.
Discussion about this post