Gjatë një takimi me grupin parlamentar dhe kabinetin qeveritar, kryeministri Edi Rama sulmoi qeverinë Berisha të më shumë se një dekadë më parë, për të përcjellë mesazhin se shumë aspekte janë përmirësuar që prej asaj kohe.
Këtu ai përmendi, sigurinë, arsimin, lirinë e protestave, drejtësinë apo korrupsionin, edhe pse më vonë gjatë fjalës së tij pranoi se “korrupsioni nuk është zmbrapsur aty ku s’mund të jetë më një kërcenim i vazhdueshëm për Shqipërinë”.
Fjalimi e vijoi duke përsëritur pretendimin e shumëpërdorur që mund të përmblidhet në fjalinë “kemi bërë shumë, kemi akoma shumë për të bërë, por më të mirë se ne s’ka”.
Një pjesë të konsiderueshme të ligjërimit e zuri paralajmërimi për ministrat, deputetet, kryebashkiakët apo zyrtarët e PS, për të cilët u shpreh se “do ti lëshojë” nëse zbulohet se janë të përfshirë në korrupsion.
“Kush flirton me atë armik (korrupsionin) nuk ka asnjë punë me ne. Ashtu si është zgjedhur në krye të një bashkie nëse fut duart në arkën e shtetit dhe xhepat e këtij populli, nuk është ne dhe nuk mund të kërkojnë asgjë tjetër veçse përbuzje. E thënë ndryshe çdo anëtar i kësaj familje politike që bën korrupsion është një tradhtar i dyfishtë, jo vetëm i popullit shqiptar por edhe i PS”, tha Rama.
“Unë nuk lëshoj vetëm djalin e vogël kur do të hidhet nga ndonjë shkëmb, por nuk mund të mbaj asnjë burrë me para të vjedhura më karrige kur i vjen ora të thirret… Nëse s’ke bërë gjë s’ke nevojë të mbajë as unë as PS, të mban e vërteta, ndaj lufto për të vërtetën tënde”, theksoi.
“Pastaj kur thonë Rama e ka kështu se i përdor dhe i hedh si limona të shtrydhur që nuk i duhen më e ka shumë gabim. Kush e ushqen me korrupsion krimbin e dëshirës për vetëpastrim nuk është një limon i shtrydhur që e hedh unë, por një mollë e kalbur që bie vetë”, shtoi ai, ndërsa më tej gjatë ligjërimit, tha se nuk mund të jetë në dijeni të të gjitha rasteve të korrupsionit të tijëve. Kreu i qeverisë shprehu qëndrimin se është “absurde” që ai të mbajë përgjegjësi morale për anëtarët e qeverisë së tij apo zyrtarë të tjerë të lartë socialistë që kapen në afera.
Pjesë të fjalës së tij, Rama kishte sërish edhe sulmet ndaj medias, teksa raportet e institucioneve prestigjioze po regjistrojnë një rënie të lirisë së mediave në vend.
Ai përsëriti edhe premtimin për tendera me inteligjencë artificiale, një nismë që shihet me skepticizëm nga ekspertët e fushës.
Rama sulmoi dhe Prokurorinë e Tiranës, teksa foli për dosje të evazionit fiskal, që sipas tij, “flenë” aty.
“SPAK dhe prokuroria e Tiranës janë në një distancë fizike më pas se 1 km. Në SPAK kërkohet llogari edhe për një punonjëse të thjeshtë, në prokurorinë e Tiranë mbrohet evazioni fiskal. Janë 80 raste që flenë prej vitesh në prokurorinë e Tiranës për evazion fiskal. Në ato raste ka dhe edhe nga ata që ndryshe quhen oligarkë. Bëhet fjalë për qindra miliona euro, të shmangura nga detyrimet tatimor. Ajo është distanca, më pak se 1 km. Tjetër drejtësi atje tjetër aty. Nuk ka forcë mal me dosje nuk ka lumë me shifra që e tund evazionin fiskal që e ka bërë strehë Prokurorinë e Tiranës”, tha Rama.
Deklaratat për korrupsionin – Mesazh për Veliajn?
Mbledhja e thirrur nga Rama dhe mesazhet se do të lëshojë të korruptuarit në gjirin e PS-së jepen në ditën kur protestohet për dorëheqjen dhe arrestimin e Veliajt lidhur me aferën “5D” dhe atë të inceneratorit të Tiranës.
Në një pjesë të hapësirës mediatike, mesazhet e Ramës shihen si një paralajmërim për kryebashkiakun e kryeqytetit Erion Veliaj, i thirrur në SPAK të martën e kaluar si për tu pyetur si person në dijeni për procedimin penal të djegësit e Tiranës.
Discussion about this post