Protestuesit në Tiranë kanë vijuar edhe këtë mbrëmje të shprehin pakënaqësinë ndaj qeverisë përmes pankartave dhe mesazheve simbolike të mbajtura në duar gjatë tubimit.
Në disa prej tyre janë përdorur tone ironizuese ndaj politikave qeveritare, ku një nga pankartat krahason trajtimin e disa shkeljeve në Shqipëri me vendet e Bashkimit Evropian.
“Në Shqipëri burg për ndërtimin e një muri, në BE gjobë”, shkruhet në njërën prej pankartave të protestuesve, duke iu referuar debatit mbi ndërtimet dhe zbatimin e ligjit.
Qytetarët kanë përcjellë gjithashtu mesazhe kundër heshtjes së institucioneve, duke deklaruar se mungesa e reagimit nga politika e forcon më shumë vendosmërinë e tyre për të vijuar protestat.
Tubimet në kryeqytet kanë vijuar prej disa javësh, me pjesëmarrësit që kërkojnë ndryshime në vendimmarrjen politike dhe më shumë përgjegjësi nga institucionet shtetërore. Pankartat dhe mesazhet e protestuesve janë kthyer në një nga format kryesore të shprehjes së pakënaqësisë gjatë këtyre tubimeve.
Discussion about this post