Ministrja e Shëndetësisë, Ogerta Manastirliu ka publikuar një video të mjekes obstetër-gjinekologe, Rubena Moisiu për të tregur se nuk janë të vërteta hipotezat se vaksinimi ndikon apo dëmton gratë shtatzëna.
Teksa në Kosovë kanë ndërruar jetë gjashtë gra shtatzënë brenda vitit nga Covid, Moisiu këshillon gratë që planifikojnë shtatzëni të bëjnë vaksinën në kohën e duhur që të jenë më të mbrojtura. Sipas saj, nuk ka asnjë fakt shkencor që të provojë se vaksina dëmton apo pengon shtatzëninë.
“Nuk ka asnjë të dhënë shkencore deri më sot e cila të vërtetojë ose mbështesë faktin që vaksina pengon mundësinë e një shtatzënie. Përkundrazi, rekomandojmë gratë shtatzëna të bëjnë vaksinën në kohën e duhur që të jenë të mbrojtura,”- tha mjekja.
Situata me Covid në vendin tonë po bëhet alarmante, ku vetëm ditën e djeshme humbën jetën 3 persona, ndërsa u regjistruan 896 raste të reja. Gjithashtu, ditën e shtunë u rihap sërish spitali Covid 3.
