Fëmijët e Rozhajës në Malin e Zi do të mësojnë shqip. Kjo pasi shkolla në fshatin Dacaj të Rrozhajës është inauguruar nga Kryeministri në detyrë, Dritan Abazoviç.
Kryeministri Edi Rama dhe ish-Presidenti, Ilir Meta, kreu i PL, kanë reaguar në rrjetet sociale lidhur me këtë zhvillim shumë pozitiv.
“Nga sot, vogëlushët në Rozhajë të Malit të Zi do të marrin dije në gjuhën shqipe në shkollën e sapo përuruar nga miku im, Dritani, ma i miri i të tanëve”, shkroi Rama.
Ndërsa, Meta pasi ka falenderuar Kryeministrin Abazoviç dhe institucionet e Malit të Zi, “që i dhanë sërish jetë kësaj vatre shumë të rëndësishme arsimore për shqiptarët atje”, shpreh urimet për fëmijët me kombësi shqiptare të kësaj treve. Meta shkruan se “rihapja e shkollës në gjuhën shqipe në Rozhajë do të japë kontribut në forcimin e identitetit tonë kombëtar”.
“Një falenderim për Kryeministrin Abazoviç dhe institucionet e Malit të Zi që i dhanë sërish jetë kësaj vatre shumë të rëndësishme arsimore për shqiptarët atje dhe e realizuan këtë kërkesë time të hershme.
Rihapja e shkollës në gjuhën shqipe në Rozhajë jam i bindur se do të japë kontribut në forcimin e identitetit tonë kombëtar dhe padyshim më shumë kuptim ëndrrave dhe së ardhmes së fëmijëve shqiptarë të kësaj treve. Ndaj mezi po pres të rikthehem sërish në Dacaj!”, shprehet Meta.
Discussion about this post