Ministrja e Arsimit, Evis Kushi, u përfshi ditën e sotme në një debat mes deputetes demokrate, Ina Zhupën, për një kronikë që është publikuar në media pak ditë më parë, ku fëmijët në shkollën e Babicës në Vlorë e zhvillonin mësimin në një lokal dasmash.
Ministrja Kushi tha se fotoja është montazh duke sjellë reagimin e deputetes demokrate Ina Zhupa. Në debat u përfshi edhe drejtuesi i komisionit Petro Koçi, që i kërkoi deputetes së PD-së që të pushonte.
Debati në komision:
Evis Kushi: Për një shkollë më thonë, ajo fotoja në fshatin Babicë është montazh, duhet ta verifikoj, nuk mund të marr të mirëqenë. Ne kemi videon qe mësimi po bëhet normal në Vlorë. Unë do të ngre grupin e punës ta çoj në vend.
Petro Koçi: Hë se nuk do ta bëjmë muhabet lagje këtu. Bëhet pyetja përgjigjet ministrja. Nuk do të tallemi këtu që t’i të flasësh tërë ditën, more vesh, mora thuaj. Nuk do të bëjmë muhabet pazari. Mos ndërhyj më pa rregull këtu. Pikë. Respekto rregullin dhe këtë komision.
Ina Zhupa: Unë nuk intimidohem. Është fakt, nuk mund të mohojmë faktet.
Petro Koçi: Lëri moj faktet ti, ku i gjete faktet?
Rikujtojmë se nxënësit e fshatit Babicë në Vlorë zhvilluan procesin mësimor në një lokal dasmash pasi godina e shkollës 9 vjeçare “Selam Musai” është në restaurim. Por skandali më i rëndë qëndronte tek fakti se zyra e Arsimit në Vlorë nuk ishtefare në dijeni të këtij fakti.Aty bënin mësim bashkë nxënësit e klasës së parë dhe të dytë, ndërsa pasdite ato të klasave nga e treta tek e pesta.
