Rektor i Universitetit të Tiranës, Artan Hoxha në emisionin “Log.” me gazetarin Endri Xhafo tha se pjesëmarrja e studentëve në procesin mësimor online për Universitetin e Tiranës ka qenë në masën 50%.
Ai theksoi se për shkak se procesi mësimor u zhvillua online është kërkuar që edhe mbyllja të bëhet online.
“Diploma online nuk mund të konsiderohet. Programi i studimit ka qenë i njëjtë, por që për shkak të pandemisë nuk u zhvillua në auditor”, tha Hoxha.
Gjatë bisedës me gazetarin Endri Xhafo, Rektori Artan Hoxha tha se mësimi online nuk është normalitet i zhvillimit të proceseve mësimore.
“Në një situatë normale mësimi zhvillohet sipas strukturës së vitit akademik. Mësimi online nuk është normaliteti i zhvillimit të proceseve mësimore. Proceset mësimore zhvillohen në auditor, kontakti pedagog – student është i nevojshëm.
Nëse ne do të kemi hapësirën e përdorimit të auditorit, pra nuk do të jemi në nivel që mund të kombinojnë auditorin me mësimin në distancë, ne do të përdorim auditorin. Kjo situatë sot është nga e keqja. Tjetër është përvoja që marrim, tjetër është se si ne e përdorim këtë përvojë”, u shpreh ai.
Artan Hoxha më tej theksoi se tarifat në Universitetin e Tiranës në krahasim me vite më parë kanë ardhur në ulje.
“Tarifat në Universitetin e Tiranës janë mëse të arsyeshme dhe shkojnë deri në rendin e kostos së studentit për të ndjekur Arsimin e Lartë në këtë universitetit. Janë tarifa që krahasuar me vite më parë kanë ardhur në ulje dhe ne sot e kemi një nga burimet e mbajtjes në këmbë të Universitetit nga pikëpamja financiare sepse ne operojmë me disa burime financimi.
Është granti i qeverisë që mbulon 85% të pagave dhe të gjysmës së tarifës së studentëve apo përjashtimin e atyre tarifave që nuk paguhen prej tyre që do të thotë që gjithsesi ai ikën dhe mbeten shumë aktivitete të universiteti pa mbulesë financiare”, shtoi më tej Hoxha.
