Legjenda e Barcelonës, Lionel Messi, ka reaguar menjëherë pas triumfit të klubit katalanas në La Liga, duke emocionuar tifozët me një mesazh të shkurtër, por shumë domethënës.
Skuadra e drejtuar nga Hansi Flick siguroi matematikisht titullin kampion pas fitores së madhe ndaj Real Madridit në “El Clasico”, duke rikthyer festën në Katalonjë.
Pas fishkëllimës së fundit, urimet nisën të vinin nga shumë figura të futbollit botëror, por reagimi i Messit ishte ai që mori më shumë vëmendje në rrjetet sociale.
“Kampionë. Forca Barcelona”, shkroi ylli argjentinas në Instagram.
Mesazhi u shpërnda me shpejtësi nga tifozët anembanë botës, të cilët e panë si një tjetër dëshmi të lidhjes së veçantë që Messi vazhdon të ketë me klubin ku u bë legjendë.
Edhe pse prej vitesh larg “Camp Nou”, emri i Messit vazhdon të lidhet ngushtë me Barcelonën dhe çdo reagim i tij për klubin katalanas kthehet menjëherë në lajm.
Ndërkohë, kapiteni i Argentinës po vazhdon aventurën e tij tek Inter Miami, ku synon të fitojë trofe të tjerë, ndërsa në horizont mbetet edhe pjesëmarrja në Kupën e Botës 2026 me kampionët në fuqi të kompeticionit.
Discussion about this post