Inter de Miami nuk mjaftohet me blerjen e Lionel Messit. Klubi nga Florida ‘ka ndezur motorët e merkatos’ për të ndërtuar një skuadër sa më konkurruese në krah të ‘pleshtit’, teksa në listën e pronarit të klubit, David Beckham janë tashmë edhe dy argjentinas të tjerë.
Bëhet fjalë për Angel Di Marian dhe Leandro Paredes, të cilët kanë mbyllur aventurën e tyre një vjeçare te Juventusi dhe janë në pritje për të mësuar të ardhmen e tyre.
Që të dy futbollistët janë miq të ngushtë të Lionel Messit, që duket se i ka kërkuar Beckhamit t’ia sjellë te Inter Miami, në mënyrë që të luajnë sërish të tre, ashtu si te përfaqësuesja argjentinase.
Pas 16 javësh, Inter Miami është në vendin e fundit me 15 pikë, por revolucioni tashmë ka nisur, pasi Beckham ka shkarkuar trajnerin Phil Neville dhe pritet që pas Messit, të sjellë në pankinë Tata Martinon.
E nëse arrin të firmosë edhe me Di Marian e Paredesin, atëherë skuadra mund të ndryshojë tërësisht fytyrë dhe të luajë për objektiva madhorë.
Discussion about this post