Lionel Messi ishte protagonisti absolut i ndeshjes së parë të Argjentinës në Botërorin 2026, duke realizuar një tripletë spektakolare në fitoren 3-0 ndaj Algjerisë dhe duke shkruar një tjetër faqe historie me fanellën e “Albiceleste”.
Kapiteni argjentinas hapi serinë e golave në minutën e 17-të me një supergoditje nga distanca, që la të palëvizur portierin kundërshtar.
Messi nuk u ndal me kaq. Në minutën e 60-të, pas një goditjeje të Alexis Mac Allister të pritur nga portieri Zidane, “pleshti” shfrytëzoi topin e kthyer dhe e dërgoi në rrjetë për golin e dytë personal.
Vetëm 16 minuta më vonë erdhi edhe kryevepra e tretë. Topi përfundoi te Messi në hyrje të zonës dhe ylli argjentinas goditi menjëherë me të majtën, duke e vendosur sferën në cepin e portës për të vulosur tripletën dhe rezultatin përfundimtar 3-0.
Kapiteni i Argjentinës, Lionel Messi, vazhdon të shkruajë historinë e futbollit botëror. Falë tripletës së realizuar në fitoren 3-0 ndaj Algjerisë në ndeshjen hapëse të Botërorit 2026, ylli argjentinas arriti në kuotën e 16 golave në Kupën e Botës, duke barazuar rekordin absolut të mbajtur prej vitesh nga legjenda gjermane Miroslav Klose.
Mbrëmja në Kansas City ishte e veçantë në shumë aspekte për Messin. Ai zbriti në fushë për ndeshjen e tij të 200-të zyrtare me fanellën e Argjentinës dhe u bë futbollisti i parë në histori që merr pjesë në gjashtë edicione të Kupës së Botës, nga Gjermania 2006 deri te Botërori i vitit 2026.
Në moshën 38-vjeçare, sulmuesi i Argjentinës vendosi edhe një rekord tjetër, duke u bërë lojtari më i moshuar që realizon një tripletë në një ndeshje të Botërorit.
Tre golat ndaj Algjerisë jo vetëm që i siguruan fitoren kampionëve në fuqi të botës, por e ngjitën Messin në majën e renditjes së golashënuesve më të mirë në historinë e turneut.
Pas këtij suksesi historik, Messi ka mundësinë që në ndeshjet e ardhshme të lërë pas Klosen dhe të bëhet i vetëm mbreti i golave në historinë e Kupës së Botës.
Argjentinë 3-0 Algjeri
Messi 17’, 60’, 76’
Goli i parë i Messit (Video)
Goli i dytë i Messit (Video)
Goli i tretë i Messit (Video)
Discussion about this post