Nis gjyqi në themel, ish presidenti Meta hyn në sallë dhe bën shqiponjën me duar: Shqipëria, e shqiptarëve

Ish- presidenti, Ilir Meta ka mbërritur në ambientet e Gjykatës së Posaçme ku zhvillohet seanca në themel.

Mësohet se Meta sapo ka hyrë ka përshëndetur me dy gishta, më pas ka bërë edhe simbolin e shqiponjës, duke thënë: Shqipëria, e shqiptarëve!

Kreu i Partisë së Lirisë i ka kërkuar GJKKO-së që seancat gjyqësore ndaj tij, të transmetohen live për mediat.

“Unë jam në pozita të pabarabarta. Në pozita të pabarabarta janë ata që i ka përzgjedhur Charls McGonigal për të montuar me shpifje me gënjeshtra, me kallëzues të rremë një proces të turpshëm kundër shtetit shqiptar, jo kundër Ilir Metës, presidentit, kryetarit të Kuvendit dhe kryeministrit të Republikës. Prandaj ju ftoj që nga sot deri në sekondën të transmetoni live këtë proces”, tha Ilir Meta.

Presidenti i Partisë së Lirisë, thotë se mediave duhet t’u garantohet sinjali i transmetimit live, duke theksuar se “Transparenca përpara qytetarëve shqiptarë dhe llogaridhënia është detyrim për çdo institucion dhe çdo funksionar publik.”

Përfaqësues të Partisë së Lirisë kanë mbërritur në Gjykatën e Posaçme, për të ndjekur seancën.

Kujtojmë që Ilir Meta ndodhet në qeli prej tetorit të vitit 2024, dhe SPAK e ka marrë të pandehur për korrupsion, pastrim parash dhe fshehje pasurie, lidhur me dosjen Cez-Dia dhe lobimin e LSI-së në SHBA. E pandehur është edhe ish-bashkëshortja e tij Monika Kryemadhi, ndaj të cilës ka masë detyrim paraqitje.