Meta: Berisha vetëm një herë ka qenë në shtëpinë time, Basha me muaj të tërë

Në një intervistë për mediat, Presidenti i Republikës, Ilir Meta ka folur sërish për deklaratat e kryedemokratit Lulzim Basha ndaj tij.

Ai është shprehur se ish-kryeministri Sali Berisha ka qenë në shtëpinë e tij vetëm një herë, ndërsa Basha nëse do i numëronte ditët me muaj të tërë. Kreu i Shtetit tha se nuk ka asnjë hall dhe nëse ngelet në dorën e Bashës, askënd mos e zëntë halli.

“Zoti Berisha vetëm një herë ka qenë në shtëpinë time. Zoti Basha, nëse do t’i numëroja ditët ka qenë me muaj të tërë, me familjen, me vajzat, më shumë se kushdo politikan tjetër në shtëpinë time. Ndaj kur e dëgjova para pak kohesh për herë të parë zoti Basha mendova mos e kishte me deputetin socialist të Vlorës, Ilir Metaj. Unë nuk kam pasur dhe nuk kam asnjë hall, ndaj nëse ngelem në dorën e zoti Basha për të zgjidhur hall, askush mos e zëntë halli në këtë botë” – tha Meta.

Ndërsa sa i përket bashkëpunimit me PD, ai u shpreh i hapur si një ish-student i Lëvizjes së Dhjetorit.

“Unë jam shumë i hapur për të bashkëpunuar me Partinë Demokratike, dhe si një ish-student i Lëvizjes së Dhjetorit, pavarësisht se bindjet e mia nuk përputhen me të djathtën” – tha Meta.