Dy liderët e opozitës, Ilir Meta dhe Sali Berisha nuk kanë arritur “të bien dakord” me njëri-tjetrin për sa u përket orareve në takimet e paralajmëruara nga secili prej tyre këtë pasdite. Si Meta ashtu dhe Berisha kanë vendosur që të zhvillojnë takimet në kuadër të aksionit opozitar, në të njëjtin orar.
Kreu i PD-së, Sali Berisha shkruan në rrjetet sociale se në orën 19:00 do të zhvillojë një takim me mësues dhe ekspertë të arsimit parauniversitar mbi problematikat që hasin fëmijët në shkolla.
“Ju ftoj të më ndiqni sot në orën 19.00 teksa bisedoj me mësues e ekspertë të arsimit parauniversitar mbi sfidat dhe problematikat e shkollave dhe stafeve pedagogjike shqiptare, politizimin e arsimit dhe rrezikun që droga paraqet për fëmijët në shkolla”, shkruan Berisha.
Në të njëjtën orë, kreu i Partisë së Lirisë, Ilir Meta do të zhvendoset në Vlorë aty ku do të zhvillojë takime me përfaqësues të partisë së tij.
“Të dashur miq! I lumtur të rikthehem sot në Vlorën e Lirisë dhe Flamurit Kombëtar!
Në ora 19:00 do të kem kënaqësinë të takoj përfaqësues të Partisë së Lirisë dhe të japim mesazhe për të gjithë vlonjatët e ndershëm, patriotë dhe liridashës”, shkruan ish-presidenti.
Discussion about this post