Me anë të një postimi në Facebook, Presidenti Ilir Meta ka reaguar pasi homologu i tij rus, Vladimir Putin njohu pavarësinë e rajoneve separatiste të Ukrainës Lindore, Donetskut dhe Luanskut. Kreu i shtetit dënon vendimin e Rusisë dhe sipas tij, ky akt unilateral është shkelje e rëndë e ligjit ndërkombëtar dhe marrëveshjes së Minskut. Meta thotë se ky vendim minon integritetin territorial dhe sovranitetin e Ukrainës.
“Dënoj njohjen nga Rusia të pavarësisë së rajoneve separatiste të Ukrainës Lindore të Donetskut dhe Luhanskut. Ky akt unilateral është një shkelje e rëndë e ligjit ndërkombëtar, e marrëveshjes së Minskut, si dhe minon integritetin territorial dhe sovranitetin e Ukrainës! Shqipëria qëndron e bashkuar me partnerët dhe aleatët në mbështetje të Ukrainës” – shkruan Meta.
Në lidhje me këtë ka reaguar edhe Ministrja për Evropën dhe Punët e Jashtme, Olta Xhaçka, ku ka dënuar vendimin e marrë nga Presidenti rus Vladimir Putin për njohjen e pavarëisë së rajoneve të Ukrainës Lindore të populluara nga separatistët rusë, respektivisht Donetskut dhe Luhanskut. Përmes një postimi në facebook, ministrja Xhaçka thekson se ky veprim është një shkelje e qartë e ligjit ndërkombëtarë.
“Shqipëria dënon njohjen e pavarësisë nga Rusia, të rajoneve lindore të Ukrainës , Donetsk dhe Luhansk. Kjo është një shkelje e qartë e ligjit ndërkombëtar, e marrëveshjes së Minskut si dhe cënim i intregriteti territorial dhe pavarësisë së Ukrainës. Shqipëria qëndron krah aleatëve dhe partnerëve ndërkombëtarë, në mbështetje të Ukrainës!” – shkruan ministrja Xhaçka.
Discussion about this post