Kryetari i Partisë së Lirisë, Ilir Meta, ka dhënë një konferencë për shtyp sot nga Korça, ku ka analizuar situatën e rëndë politike të vendit, pozicionin ku gjendet opozita, synimet e mazhorancës dhe drejtësinë e dirigjuar nga Kryeministri Edi Rama.
“Opozita është në këtë situatë të vështirë dhe tepër sfidante sepse kemi të bëjmë me një projekt të mirëplanifikuar prej kohësh për asgjësimin e pluralizmit politik në Shqipëri, – tha Meta, – ndaj nuk ka qenë rastësi djegia e mandateve nga ana e opozitës dhe lënia e gjithë parlamentit për këto 2 vite Edi Ramës për të bërë dhjetëra ligje me porosi për të kapur drejtësinë, por njëkohësisht dhe për të shmangur llogaridhënien për konçensionet që janë tërësisht të pamonitorueshme.
Çështja e inceneratorit është bërë më e prekshme, për shumë arsye, por ka dhe shumë konçensione në fushën e shëndetësisë, infrastrukturës e kudo tjetër.
Opozita pa asnjë diskutim ka përgjegjësitë e saj, por po lufton në mbrojtje të pluralizmit politik për kushtetueshmërinë për të kthyer Kuvendin në funksionin e tij që e ka humbur prej kohësh dhe është në aksion të vazhdueshëm.
Çdo ditë mazhoranca ka vetëm një qëllim, asgjësimin e pluralizmit politik dhe përçarjen e opozitës. Unë besoj se qytetarët janë shumë të qartë për pasojat që po paguajnë, për këtë situatë të degradimit të demokracisë besoj se do të japin kontributin e tyre në fuqizimin e opozitës. Ne të gjithë do të bëjmë punën tonë më shumë se deri tani.
Meta ndërsa u pyet a ka frikë se mos merret masë ndaj tij, si rasti i arrestit të shtëpisë për Berishën, tha:
“Drejtësia me regji bashkë me një realitet prej kohësh është pa asnjë diskutim një produkt i Rama-formës që është tjetërsimi i drejtësisë në reformë, sipas kushtetutës që u bë me 140 vota.
Përmes shkeljeve të saj, nga reformë në një Rama-formë të shërbimit të tij përmes kapjes të këtyre institucioneve, dhe përmes direktivave në partinë e rilindjes për ta orientuar atë drejt goditjes së opozitës dhe së dyti për të shmangur vëmendjen nga skandalet që ulërijnë, të qeverisë.
Kjo është arsyeja që ata s’guxojnë të përmendin emrin e Edi Ramës në skandale, edhe në atë të inceneratorëve dhe të tjera.
Kjo është arsyeja që izolohet zoti Berisha, lideri i partisë kryesore opozitare ndërsa të gjithë e dinë që për çështjen për të cilën ai izolohet, vendimin për tjetërsimin e klubit sportiv Partizani, nga një klub sportiv në një kompleks ndërtimesh, e ka bërë vetë Edi Rama”, tha ai.
Discussion about this post