Presidenti Ilir Meta ka vlerësuar figurën e ish-presidentit Bujar Nishani, për të cilin sot po mbahen homazhe në Presidencë pasi ndërroi jetë disa ditë më parë në një spital në Gjermani.
Kreu i shtetit tha për mediat se Nishani ishte një politikan dhe një shtetar i përgjegjshëm duke shtuar se ai shkëlqeu në çdo detyrë që i ishte caktuar.
“Ai nuk ishte vetëm një bashkëshort dhe prind shembullor, por pa asnjë diskutim, ishte një nga politikanët, shtetarët më të përgjegjshëm dhe më serioz të këtyre dekadave. Ai në çdo detyrë politike dhe shtetërore shkëlqeu me korrektësinë e tij dhe me integritetit e tij, me principalitetin e tij dhe konstruktivitetin që e karakterizonte, në çdo detyrë. Në mënyrë të veçantë dhe atë të presidentit, ishte një mbrojtës i shkëlqyer i interesit kombëtar dhe interesit publik dhe i demokracisë. Ai lë pas një trashëgimi shumë pozitive dhe një kujtim të paharruar për të gjithë ata të cilëve u shërbeu me përkushtim, besnikëri, edhe për të gjithë ata që patën një mundësi ta njihnin më pranë dhe të njihnin virtytet më të mira që ai mishëronte në personalitetin e tij human”, tha Meta.
Discussion about this post