President i Partisë së Lirisë Ilir Meta veshi bluzën “Lironi liderin e opozitës”, referuar Sali Berishës, ndërsa iu bashkua protestës në mbështetje të kryedemokratit këtë të shtunë.
Duke folur për mediat, ai thuri lavde për Berishën duke e cilësuar si njeriu që ka futur Shqipërinë në NATO si dhe autor i shumë arritjeve të tjera për vendin, teksa foli edhe për bashkim të opozitës.
“Padiskutim që bashkimi i opozitës. Bashkimi bën fuqinë. Berisha nuk është në arrest shtëpie, është në piedestal. I kanë dhënë mundësinë të shoh më lart se ne këtu. Opozita është në një moment pozitiv të bashkimit”, tha Meta.
Kreu i PL-së mbajti edhe një fjalim nga mikrofoni i tubimit në mbështetje të Berishës.
“Moj Serbi, murin ta prisha se më thonë Sali Berisha”, e nisi ligjërimin Meta.
“Po, Sali Berisha është atje dhe nuk është këtu se doli kundër copëtimit të Kosovës. Sali Berisha është atje dhe nuk është këtu se doli kundër shpopullimit të Shqipërisë. Sali Berisha është atje dhe nuk është këtu se nuk u bë pjesë e pazareve të ulëta për të shkatërruar pluralizmin politik. Ata kujtojnë se kanë izoluar Sali Berishën, por ata e kanë ndihmuar Sali Berishën, i kanë dhënë një podium më të lartë, e kanë afruar me qiellin dhe me Zotin që t’u flasë shqiptarëve më kthjellët. Adenauer ka thënë të gjithë jetojmë në të njëjtin qiell, por nuk shohim të njëjtin horizont. Sali Berisha ka avantazhin që këta puçistët e Ramaformës e kanë ngjitur lart dhe shikon shumë më tepër se ne që jemi këtu poshtë”, u shpreh Meta.
Akuza hodhi ndaj kryeministrit Edi Rama.
“Edi Rama, është fatkeqësi e madhe për mua që u bënë 20 e ca vite duke bashkuar në politikë dhe pas 25 vitesh, politikani më serioz mbetet Sali Berisha. Pse? Sepse Shqipëria në 25 vite duhej të kishte nxjerrë politikanë më të mirë se Sali Berisha e Ilir Meta. Por çfarë t’i bëjmë? Nga zona nga vij unë, gjyshërit na mësonin se kur situatat janë të vështira, të themi se malet tona edhe më të larta”, shtoi Meta.
Discussion about this post