Presidenti ka reaguar në lidhje me deklaratën e kreut të PD-së, Lulzim Basha, ku e futi kreun e shtetit pjesë të “trekëndëshi i Bermudës”, Rama-Berisha-Meta.
Në një intervistë për mediat, Meta tha se problemi është katërkëndëshi i përgjegjësive madhore të Lulzim Bashës, bojkoti i reformës territoriale, bojkoti i reformës në drejtësi, djegia e mandateve dhe zerimi i pushtetit vendor.
Mes të tjerash Meta pohoi se tashmë ka ardhur koha që politikanët në Shqipëri të marrin përgjegjësi dhe jo t’i ikin atyre.
“Është e drejta e tij të bëjë lapsuse, edhe të ketë ndoshta ndonjë mendim të tij, se është i lirë. Unë e kam respektuar gjithmonë dhe jam përpjekur ta ndihmoj që ai të mos gabojë rëndë. Por, më duhet të them që është koha që politikanët në Shqipëri të marrin përgjegjësi dhe jo t’i ikin atyre. Prandaj jemi në një situatë të tillë ku vihet në diskutim edhe legjitimiteti i partisë kryesore të opozitës, pas problemeve të mëdha të legjitimitetit të Parlamentit, të pushteti lokal, të Presidentit” – ka thënë Meta.
Si kundërpërgjigje, Meta ka thënë se problemi kryesor në këtë rast është katërkëndëshi i përgjegjësive madhore, që sipas tij është përgjegjës Basha.
“Nuk është problemi i trekëndëshit që thotë zoti Basha. Ky është problemi i tij. Problemi kryesor në këtë rast është katërkëndëshi i përgjegjësive madhore, të cilave ai nuk mund t’i ikë dhe nuk mund t’ua shkarkoj të tjerëve. Dhe kush është ky katërkëndësh i përgjegjësive madhore i cili ka vetëm një rezultat kapjen totale të shtetit sot?
Së pari, bojkoti i reformës administrative-territoriale përpara zgjedhjeve vendore të 2015.
Së dyti, që në momentin që është hedhur ideja e djegies së mandateve kam thënë që kjo është një çmenduri, si do digjni mandatet.
Për çështjen e pushtetit lokal e njëjta gjë dhe po kështu bojkoti i reformës në drejtësi ishte me pasoja katastrofike në kapjen e shtetit.
Bojkoti i reformës administrative-territoriale, bojkoti i Reformës në Drejtësi, djegia e mandateve në Parlament dhe zerimi i opozitës nga pushteti lokal, janë 4 përgjegjësi madhore që Lulzim Basha, nuk u ikën dot” – është shprehur Meta.
Kujtojmë që para disa ditësh kreu demokrat Lulzim Basha, ka sulmuar presidentin Meta, kryeministrin Rama dhe ish-kryeministrin Berisha, duke i quajtur si “Trekëndëshi i Bermudës” dhe që kanë marrë peng tranzicionin në Shqipëri.
Discussion about this post