Kryetari i Partisë së Lirisë, Ilir Meta, është shprehur se vendimi i “Apelit” për “vulën” e Partisë Demokratike është një vepër e kryeministrit Edi Rama për të penguar këtë forcë politike për të marrë pjesë në zgjedhje.
Komentet Meta i bëri gjatë një deklarate për mediat, ku tha se çdo shqiptar i di çmenduritë e Ramës.
Meta shtoi se 14 maji do të ejtë një referendum për të shporrur regjimin monist dhe sipas tij, ai që guxon të prekë qoftë edhe një votë, do të mbajë përgjegjësi përpara gjithë botës.
“Qëndrimi im ka qenë dhe mbetet një: Respekti i vullnetit të anëtarëve dhe të simpatizantëve të PD, i cili është demonstruar në mënyrë publike dhe transparente përmes ‘Foltoreve’ dhe Kuvendit të 11 Dhjetorit, që ka qenë tepër publik dhe transparent, por që është demonstruar edhe në zgjedhjet e pjesshme të 6 Marsit vitin e kaluar dhe që është demonstruar nga akti i vetëm për sa i takon çështjes së njohjes së vendimeve të marra nga PD, që është ai i gjykatës përpara një viti.
Pastaj, çmenduritë e regjimit të Edi Ramës, këto i di çdo qytetar i Shqipërisë, përfshirë edhe socialistët e ndershëm, por i dinë edhe më mirë të gjithë opozitarët dhe të gjithë demokratët, pra mënyrën se si ai pengoi regjistrimin e vendimit të gjykatës dhe të gjitha lojërat e deritanishme.
Një gjë mund t’ua them me bindje të plotë: Më 14 maj, Partia e Lirisë dhe e gjithë opozita e vërtetë do të jetë atje te kutitë e votimit.
Më 14 maj, asnjë votë nuk do të guxojë ta prekë dikush, sepse nëse do ta prekë, atëherë do të mbajë të gjithë përgjegjësitë përpara gjithë shqiptarëve dhe përpara gjithë botës që do t’i ketë sytë atë ditë në Shqipëri.
Edhe Bjellorusia e Lukashenkos është përpara nesh për shumë çështje që kanë të bëjnë me inovacionin, për shumë çështje me politikat për të rinjtë edhe pse është vendi më diktatorial në kontinentin tonë.
Discussion about this post