Një veprim politik e ka cilësuar kreu i Partisë së Lirisë, Ilir Meta, ndërhyrjen nga Policia e Shtetit në kampin e MEK që ndodhet në Manzë.
Meta tha se ajo që e shqetëson më shumë është humbja e jetës së një prej banorëve të kampit, e cila nuk kthehet më.
Ish-Presidenti tha se Qeveria ka një sjellje aspak transparente lidhur me ndërhyrjen në kampin e MEK, duke i kërkuar që të tregojë arsyet e ndërhyrjes me rreth 1 mijë trupa policore në këtë operacion.
Gjatë konferencës për mediat, Meta gjithashtu u shpreh kundër projektligjit të propozuar nga Qeveria për legalizimin e kanabisit për qëllime mjekësore.
Meta u shpreh se kjo ka ardhur pikërisht kur situata e trafikut të drogës është shumë e vështirë, duke shtuar se qeveria e policia janë të kapura kokë e këmbë. Sipas kreut të PL, institucionet kanë dështuar në luftën kundër trafikut të narkotikëve.
“Me projektligjin për kanabisin qeveria detyrohet tu paguajë atyre për kontributin madhor. Kjo miratohet në një moment kur situata e trafikut të drogës ka qenë më e rëndë se kurrë ndonjëherë. Situata është e rëndë dhe kur qeveria e policia janë të kapura kokë e këmbë. Ka një dështim total në luftën kundër saj. Përfaqësues të BE konfirmojmë se qeveria nuk është konsultuar me ta për një ligj të tillë”, tha Meta.
Ai shtoi se është shumë e qartë që legalizimi është legalizim i narkoshtetit që blen zgjedhjet e shpopullon vendin.
“Asnjë qytetar s’mund të jetë i qetë në familjet që do goditen në një mënyrë a tjetër nga ky akt. Kthimi pas i këtij ligji, e vetmja mënyrë për të zmbrapsur murtajën që ka kapluar vendin”, tha Meta.
Kreu i PL-së gjithashtu i ka drejtuar një apel shoqërisë për të reaguar lidhur me situatën ku ndodhet vendi. Meta tha se opozita ka protestuar, por edhe shoqëria duhet të reagojë.
Discussion about this post