Kreu i Partisë së Lirisë Ilir Meta reagoi sot me një mesazh nga burgu ku mbahet në akuzë për 3 vepra penale, mbi modelin ekonomik në vend duke shkruar se “modeli aktual ka dështuar”. Meta shkruan se “5 Prioritetet e Partisë së Lirisë janë rruga më e drejtë për një model të ri ekonomik që na afron me standardet e Bashkimit Europian”.
“Modeli ekonomik i vendit qëllimisht vazhdon të jetë i orientuar drejt industrisë së ndërtimit, importeve dhe shërbimeve”, shkruan presidenti i PL-së. Meta thekson më tej se qeveria nuk ka asnjë strategji të rritjes së prodhimit të industrisë përpunuese, industrisë nxjerrëse minerare, hidrokarbure, të bujqësisë, etj.
“Modeli ekonomik duhet të ndryshojë urgjentisht”, shkruan Meta.
Presidenti i PL-së nënvizon se “reforma të thella për të përshpejtuar konvergjencën e të ardhurave në BE janë të domosdoshme për të nxjerrë vendin nga këneta e narkoekonomisë dhe pastrimit të parave ku e ka zhytur vendin qeveria 12-vjeçare e “Rilindjes”.
“Për Partinë e Lirisë sfida është që me një model të ri ekonomik të arrijmë ngushtimin e përshpejtuar të diferencës së të ardhurave me vendet e rajonit dhe mesataren e vendeve europiane”, shkruan Meta.
Meta thekson se “modeli ekonomik i Partisë së Lirisë do të jetë liberalizimi i ekonomisë për të mos ta lënë zhvillimin e saj të monopolizuar në një numër të vogël kompanish kliente të qeverisë në sektorët e ndërtimit, turizmit, energjisë, shfrytëzimit të burimeve natyrore, etj”.
“Vetëm me rritje të Prodhimit të Brendshëm Bruto mbi 8% në vit ne do të përshpejtojmë ngushtimin e diferencës dhe rritjes së mirëqenies për qytetarët e këtij vendi”, shkruan Meta.
Discussion about this post