Kryetari i Partisë së Lirisë, Ilir Meta, pas takimit në selinë blu me kryetarin demokrat, Sali Berisha, tha se do të përshkallëzohet veprimi opozitar.
Meta u shpreh se bota e nëndheshme me porosi të Ramës dhe mbrojtjes së policisë së shtetit tjetërsuan votën e qytetarëve.
Ai paralajmëroi se “gomerët që u imponoi Rama qytetarëve shqiptarë për kryebashkiakë, nuk do vjedhim më të qetë”.
“Çdo minutë fakte të reja tronditëse vijnë dhe dokumentohen sesi mafia nën komandën e Ramës, shkatërroi procesin zgjedhor. I gjithë ky shkatërrim i procesit zgjedhor, i tjetërsimit të votës së lirë, jo vetëm do dokumentohet, por do vijojë edhe procesi i kontestimit ligjor, por edhe i përshkallëzimit të veprimit opozitar në emër të mbrojtjes së lirë.
Njëkohësisht e dini shumë mirë se pavarësisht nga ky tjetërsim që realizoi bota e nëndheshme, me porosi të Edi Ramës, nën mbrojtjen e Policisë së shtetit, një gjë është e qartë se gomerët e Edi Ramës nuk do vjedhin më të qetë,” tha Meta.
“Nuk ka dorëzim dhe kapitullim përpara mafies shtetërore dhe narkoshtetit. Ne do të luftojmë në emër jo vetëm të mbi 500 mijë shqiptarëve, që në kushte terrori votuan me sakrifica të mëdha, por edhe në emër të qindra-mijërave që u penguan të votojnë. Do t’i shikoni të gjitha faktet, janë denoncuar dhe do të denoncohen,” vijoi kreu i PL.
Discussion about this post