Presidenti Ilir Meta ka reaguar lidhur me ngjarjen e rëndë që ndodhi dje në Fier, ku një 8-vjeçar u vra në mënyre mizore nga fqinji i tij.Meta shprehet se vrasja e të miturit nga një person me precedent penal është thirrje alarmuese që tregon mosfunksionimin e sistemit të drejtësisë.
“Vrasja e të miturit ditën e djeshme në qytetin e Fierit, nga një person me precedentë penalë, është thirrje alarmuese për institucionet shtetërore dhe tregues i mosfunksionimit të zinxhirit të sistemit, nga vënia e drejtësisë, deri te ndëshkimi e më pas rehabilitimi.”
Meta nënvizon se dalja me shprehje tronditëse për ngjarjen dhe dënimi i saj nga përfaqësuesit e institucioneve nuk mjafton, por duhen ndërmarrë nisma konkrete të cilat forcojnë hetimin dhe parandalimin e ngjarjeve të tilla, që sipas tij janë produkt i personave që sistemi rehabilitues penitenciar dhe i post vuajtjes së dënimit, nuk ka funksionuar.
“Krimi makabër i djeshëm, që i mori jetën një fëmije të pafajshëm, ka autor, por ka dhe bashkëpërgjegjës, që nuk kanë përmbushur detyrimet shtetërore, duke krijuar terrenin për këtë vepër penale.
Nuk mjafton, që përfaqësuesit e institucioneve të dalin me shprehje tronditëse për ngjarjen dhe ta dënojnë atë.
Duhen ndërmarrë nisma konkrete për të forcuar hetimin, parandalimin e veprave të tilla nga individë, që dukshëm kanë premisat për të qenë recidivistë dhe për t`u përfshirë në krim, dhe për të cilët sistemi rehabilitues penitenciar dhe i post vuajtjes së dënimit, nuk ka funksionuar.
Nuk kam fjalë për të ngushëlluar familjen e të voglit Mateo.
Zoti dhe drejtësia ua lehtësoftë dhembjen!”, shkruan Meta.
Discussion about this post