Meta: Shqiptarët paguajnë taksa për t’u helmuar

Kreu i Partisë së Lirisë, Ilir Meta, ka zhvilluar një takim me ekipin e tij në Durrës.

Ai është ndalur në tema të prekshme për qytetarët si pagesat për inceneratorët, të cilat sipas tij, qytetarët po i paguajnë jo për të eliminuar mbetjet por për të helmuar veten.

“Rreth 9 milionë Euro (961.000.000 lekë të rinj) ose 28% e buxhetit të 2023 të Bashkisë së Durrësit do të paguhen për inceneratorin e Tiranës, që dihet botërisht që as djeg, as përpunon dhe as diferencon mbetjet, por vetëm i gropos si para 20 vjetësh.

Më pas, ujërat e kontaminuara të landfillit të Sharrës përfundojnë në lumin Erzen dhe më pas në Gjirin e Ishmit, në det në Durrës, duke ndotur një nga zonat më të bukura turistike.

Atëherë, përse i paguajnë qytetarët e Durrësit 9 milionë Euro?

Vetëm për të vjedhur kompania ‘offshore’ e Edi Ramës?

A, na falni, paguajnë edhe për t’u helmuar”, tha Meta.

Duke u ndalur në hartën e re gjyqësore, kreu i PL-së theksoi se qytetarëve të Durrësit u hiqet Gjykata e Apelit, do t’u hiqet edhe Gjykata e Shkallës së Parë Administrative, ndërkohë u është hequr edhe Zyra e Kadastrës, që është transferuar në Tiranë.

“Pra, qytetarëve të Durrësit, ‘Rilindja’ vetëm ua ka larguar shërbimet, j’ua ka bërë tepër të vështirë marrjen e drejtësisë, u ka rritur kostot për shkak të distancës dhe nuk ka ofruar asnjë lehtësi, përveçse ju ka shtuar pa fund hallet.

Ndaj Durrësi do të votojë masivisht për ndryshimin, për të ndëshkuar sektin e Rilindjes, që e përdor Durrësin vetëm për të vjedhur e plaçkitur pasuritë e tij dhe taksat e qytetarëve.

Vota për Igli Carën i jep fund nëpërkëmbjes të qytetarëve të Durrësit dhe rikthen llogaridhënien për çdo taksë të paguar dhe shërbim të ofruar”, u shpreh Meta.