Presidenti Ilir Meta, në kuadër të vizitës së tij në Kosovë, u prit sot në një takim nga Kryeministri, Albin Kurti, me të cilin bashkëndanë urimet me rastin e festës kombëtare të Ditës së Flamurit. Meta ka përgëzuar Kurtin për zhvillimin model të zgjedhjeve lokale në Kosovë, çka përbën një shembull tjetër të maturisë demokratike të institucioneve të Republikës së Kosovës.
Në njoftimin e presidencës thuhet se ka shprehur anagazhimin për të nxitur dhe thelluar në të gjitha fushat marrëdhëniet strategjike dhe vëllazërore mes dy vendeve, në plotikën e jashtme, sigurisë, infrastrukturë, ku këtu veçoi ndërtimin e linjës hekurudhore Durrës – Prishtinë dhe Shkodër – Gjakovë.
“Kreu i Shtetit vlerësoi angazhimin e Qeverisë së Kryeministrit Kurti për të nxitur dhe thelluar në të gjitha fushat marrëdhëniet strategjike dhe vëllazërore mes dy vendeve tona, si dhe vuri në pah gatishmërinë dhe vullnetin e Shqipërisë për t’i shndërruar edhe marrëdhëniet ekonomike-tregtare në të njëjtin nivel të shkëlqyer, siç janë ato politike.
Në këtë kuadër, Presidenti Meta dhe Kryeministri Kurti vlerësuan rëndësinë e forcimit të bashkëpunimit në fushën e politikës së jashtme, të sigurisë, si dhe për angazhimin e përbashkët në projekte infrastrukturore, që do të kenë impakt të rëndësishëm në zhvillimet ekonomike e sociale të vendeve tona, siç është ndërtimi i linjave hekurudhore Durrës – Prishtinë dhe Shkodër – Gjakovë” – thuhet në njoftimin e presidencës.
Në prag të mbledhjes së përbashkët të të dy Qeverive në Elbasan, Presidenti Meta shprehu besimin dhe nevojën që marrëveshjet që janë finalizuar e do të nënshkruhen, të konkretizohen në praktikë, për t’i shërbyer në mënyrë thelbësore forcimit të lidhjeve, si dhe përmirësimit të jetës së qytetarëve tanë.
Meta është pritur sot edhe nga kryetari i Kuvendit Glauk Konjufca dhe kreu i AAK-së Ramush Haradinaj. Gjithashtu takim pati edhe me kreun e PDK-së Memli Krasniqi dhe atë të LDK-së Lumir Abdixhiku.
Discussion about this post