Presidenti Ilir Meta ka zhvilluar një takim ditën e sotme me përfaqësuesen e Lirisë së Medias të OSBE, Teresa Ribeiro. Në postimin e tij në facebook, Meta thotë se media e lirë është një nga shtyllat parësore të demokracisë, e cila censurohet kur institucionet demokratike nuk funksionojnë.
Ai gjithashtu falënderoi Riberon për kontributin, që OSBE dhe zyra e saj, kanë dhënë në mbështetje të medias së lirë dhe të pavarur.
“Kënaqësi të takohesha me Përfaqësuesen e Lirisë së Medias të OSBE, Znj.Teresa Ribeiro.
Theksova se media e lirë është një nga shtyllat parësore të demokracisë. Aty ku nuk funksionojnë institucionet demokratike dhe nuk respektohen të drejtat themelore, aty gjen gjithnjë e më shumë censurë dhe autocensurë mediatike.
Me këtë rast, falënderova Znj. Ribeiro për kontributin, që OSBE dhe Zyra e saj, kanë dhënë në mbështetje të medias së lirë dhe të pavarur, si dhe përpjekjen e tyre për të prapësuar nismat, që synojnë kufizimin apo kapjen e hapësirës mediatike në Shqipëri.
Të gjithë së bashku duhet të angazhohemi, që në asnjë rrethanë, jeta, karriera dhe kushtet e punës së gazetarëve profesionistë të mos cenohen prej askujt me pushtet politik apo ekonomik” – shkruan Meta në facebook.
Këtë të hënë është zhvilluar konferenca e OSBE-së për Europën Juglindore “Gazetari në kohë krizash”, ku përfaqësuesja e OSBE-së në fjalën e saj theksoi se liria e shtypit po përballet me kushte të vështira.
