Presidenti i vendit Ilir Meta, ditën e sotme ka bërë një vizitë zyrtare në komunat arbëreshe në Kalabri. Lajmin e ka bërë të ditur vetë kreu i shtetit përmes një postimi në rrjetin e tij social Facebook. Ai ndau një video të qytezës, duke shkruar krahas saj se është mirëpritur ngrohtësisht nga autoritetet më të larta e deri te qytetarët vendas.
“Në qytezën e mrekullueshme arbëreshe të Civita u mirëprita sot ngrohtësisht nga Kryetari i Bashkisë, Alessandro Toci, autoritetet më të larta vendore e rajonale, si dhe dhjetëra qytetarë.”
Nga ana tjetër, Meta thekson se arbëreshët në këtë rajon kanë mbajtur gjallë gjuhën, traditën, historinë dhe kulturën dhe se gjithashtu meritojnë të jenë pjesë e UNESCO-s sa më parë.
U shpreha mirënjohjen më të thellë për kontributin e vyer të Arbëreshëve për mbajtjen gjallë të gjuhës, historisë, traditave, kulturës dhe trashëgimisë së Motit të Madh të Gjergj Kastriot Skënderbeut, që meritojnë sa më parë të bëhen pjesë e UNESCO. Theksova rëndësinë e nënshkrimit sa më parë të një Protokolli të Përbashkët mes Shqipërisë dhe Rajonit Kalabri, sipas atij ekzistues me Rajonin e Pulias, dhe atë të propozuar me Rajonin e Siçilisë, si një mundësi e shkëlqyer për forcimin e lidhjeve mes nesh.”
Së fundmi, Meta e ka mbyllur postimin e tij duke thënë se në themelet e miqësisë shekullore mes Shqipërisë dhe Italisë qëndrojnë arbëreshet.
“Në themel të miqësisë shekullore mes Shqipërisë dhe Italisë qëndrojnë arbëreshet, trashëgimia e pasur e të cilëve, ju përket jo vetëm popujve tanë, por është një vlerë e çmuar edhe e kulturës evropiane dhe botërore.”
Discussion about this post