Ministria e Infrastrukturës dhe Energjisë njoftoi se një tjetër kompani ka aplikuar pranë saj për të ndërtuar një impiant fotovoltaik me kapacitet të instaluar 50MW në zonën e Fierit. Zona ku parashikohet të ndërtohet impianti nëse kalon të gjithë hallkat e miratimit është Fieri. Ky investim parashikon që riskun dhe gjetjen e tregut për energjinë që prodhohet e merr vetë investitori.
“Në bazë të Nenit 15 të Vendimit të Këshillit të Ministrave nr. 822, datë 7.10.2015 “Për miratimin e rregullave dhe procedurave të ndërtimit të kapaciteteve të reja prodhuese të energjisë elektrike, që nuk janë objekt koncesioni” i ndryshuar, Ministria e Infrastrukturës dhe Energjisë njofton si më poshtë:
Shoqëria “INFO-TELECOM” Sh.p.k. ka shprehur interesin dhe ka paraqitur pranë Ministrisë se Infrastrukturës dhe Energjisë, aplikimin për ndërtimin e një impianti fotovoltaik për prodhimin e energjisë nga burime të rinovueshme, me kapacitet 50 MW, i cili nuk përfiton nga masat mbështetëse, në Njësinë Administrative Libofshë, Bashkia Fier, Qarku Fier” thuhet në njoftimin e ministrisë.
Ky është impianti i dytë që nuk përfiton nga masat mbështetëse pra që qeveria nuk ka detyrimin të blejë energjinë. Ndërkohë që më herët ishte centrali fotovoltaik Blue 2 që do të ndërtohet nga bashkimi i shoqërive “Blessed Investment” sh.p.k. dhe “Matrix Konstruksion” sh.p.k që mori miratimin.
Parku Blue 2 parashikohet të vihet në punë brenda 50 muajve nga koha e marrjes së lejes së ndërtimit. Vendndodhje e burimit gjenerues të energjisë do të jetë zona Sheq-Marinas, Bashkia e Fierit, Qarku i Fierit. Kompania do të ketë detyrimin që çdo tre muaj të njoftojë Ministrinë e Infrastrukturës dhe Energjisë për ecurinë e punimeve. Lidhur me atë çfarë do të marrë pas shteti nga ky impiant rezulton se do të paguhet 2% e sasisë së energjisë së prodhuar gjatë vitit si “royalty”, ose vlera barasvlershme në lekë.
Paralelisht me këto projekte po ndërtohen edhe dy të tjerë që mbështeten me politika ku për 15 vjet qeveria do tju blejë energjinë sipas një çmimi të dakordësuar gjatë ankandit. Bëhet fjalë për impiantin në Karavasta dhe Spitallë të dy në zbatim nga francezët e Voltalias dhe që do tju blihet energjia me respektivisht 24.89 euro/ mwh dhe 29.89 euro/mwh.
