Ardhja e Manuel Locatellit ose rikthimi i Miralem Pjanic, do të ndikonte në largimin e Aaron Ramsey nga Juventusi. Edhe pse Max Allegri e vlerëson shumë mesfushorin uellsian, ky i fundit dëshiron të luajë dhe nuk do e priste mirë përfundimin në stolin e bardhezinjve.
Në skenë ka dalë Milani, që akoma nuk e ka gjetur zëvendësuesin e Hakan Calhanoglu. Shumë emra ndodhen në listën e drejtuesve të kuqezinjve, aty ku është shtuar edhe emri i 30-vjeçarit nga Uellsi, i cili aktivizohet në të gjithë pozicionet e mesit të fushës.
Mediet italiane shkruajnë se Milani do të tentojë huazimin e lojtarit, edhe pse Juventusi do të preferonte shitjen e tij të menjëhershme. Bisedimet nuk kanë nisur akoma, por dyshja Maldini-Massara po e mendojnë seriozisht afrimin e Ramsey.
