Afro 175 mijë euro, 9.3 milionë lekë dhe 1 mijë dollarë që deri dje figuronin në llogari të ish-gjyqtarit Shkëlqim Miri, të akuzuar për korrupsion, dje kaluan në llogari të shtetit.
Agjencia e Administrimit të Pasurive të Sekuestruara dhe Konfiskuara pranë Ministrisë së Financave Tiranë, konkretisht administratori Erjon Riçku, ekzekutoi vendimin e Gjykatës së Posaçme për Korrupsionin dhe Krimin e Organizuar, i lënë në fuqi edhe nga Apeli.
Në dokumentet e siguruar nga gazeta “Panorama”, urdhërohet ekzekutimi i vendimit të datës 15.07.2020 të Gjykatës së Posaçme të Shkallës së Parë kundër Korrupsionit dhe Krimit të Organizuar, ku u vendos konfiskimi i pasurive: Konfiskimin e shumës monetare me vlerë 144 810 euro, të shumës monetare 1000 dollarë, si dhe shumën monetare me 9 335 935 lekë në zotërim të Shkëlqim Mirit.
Ndërkaq, urdhërohet pezullimi i pasojave të ekzekutimit të zbatimit të masës së sekuestrimit dhe konfiskimit për vlerën 30 mijë euro. Pezullimi përfundon menjëherë sapo të bien masat e sekuestrimit apo konfiskimit të vendosura në kuadër të procedimit penal që lidhet me vendimin penal nr.129 datë 27.11.2018, të ish-Gjykatës së Shkallës së Parë për Krimet e Rënda Tiranë.
Po ashtu urdhërohet vënia në ekzekutim e vendimit të datës 15.07.2020 të Gjykatës së Posaçme të Shkallës së Parë për Korrupsionin dhe Krimin e Organizuar, me të cilin është vendosur revokimi i masës së sekuestrimit për vlerën monetare prej 269.065 lekë dhe kthimin e kësaj shume shtetasit Shkëlqim Miri.
Për këtë vlerë, Gjykata arsyeton se është përfituar nga të ardhura të ligjshme (paga, etj.) dhe kërkohet kthimi i saj tek ish-gjyqtari Miri.
PROKURORIA
Në kërkesën e tij, prokurori i SPAK-ut, Klodjan Braho, argumenton se ish-gjyqtari Miri është dënuar për korrupsion, e kësisoj ai është subjekt i Ligjit nr.10192 datë 2 dhjetor 2009, “Për parandalimin dhe goditjen e krimit të organizuar, trafikimit dhe korrupsionit nëpërmjet masave parandaluese kundër pasurisë” dhe se mundet që t’i nënshtrohet masave parandaluese pasurore. Gjykata e Krimeve të Rënda dënoi gjyqtarin Shkëlqim Miri me 2 vite e 6 muaj burg, pasi u akuzua se liroi nga burgu të dënuarin për vrasje të dyfishtë Genjtan Doda, kundrejt një ryshfeti 20 mijë euro. Në shtëpinë e Shkëlqim Mirit u gjetën gjatë kontrollit edhe mbi 30 milionë lekë cash.
Në tetor të vitit të kaluar, Këshilli i Lartë Gjyqësor ka pranuar kërkesën e Inspektorit të Lartë të Drejtësisë për shkarkimin nga detyra të gjyqtarit Shkëlqim Miri. Inspektori i Lartë i Drejtësisë parashtroi para Këshillit të Lartë Gjyqësor konkluzionet lidhur me procedimin disiplinor ndaj magjistratit Miri me detyrë gjyqtar në Gjykatën e Apelit Tiranë./Panorama.al
