Që nga ora 10 e ditës së sotme është dhënë alarmi për një minë anti tank të gjetur në Mat. Mina është zbuluar nga banorët e zonës të cilët të alarmuar kanë kontaktuar forcat e policisë për të bërë të mundur sigurimin e zonës përreth. Ndërkohë ka folur për mediat një nga banorët e zonës, i cili tregon se punuar më herët në ushtri dhe u shpreh se brenda minës mund të kishte deri në 7 kilogramë tritol që mund të rezultojë tepër e rrezikshme për banorët të cilët kishin shtëpitë shumë pranë vendit ku është zbuluar mina. Banori shtoi se deri më tani nuk kishte pasur asnjë angazhim të specialistëve të posaçëm për të çmontuar minën anti-tank.
“Unë kam punuar në ushtri për 6 vite e gjysmë dhe i kam parë komplet të gjitha llojet e minave për të zbuluar se çfarë aktiviteti kanë. Kjo ngjyrë e kësaj mine këtu mund të jetë edhe aktive dhe mund të ketë diçka të fshehur brenda. Ekuipazhi i lartë përgjegjës për këtë punë, duhet të vijë urgjentisht sepse mund të shkaktojë dëme të mëdha duke qenë se banesat janë këtu afër. Këtu duhet një specialist por ujin në zjarr nuk e kanë vënë. Sipas meje mund të mbajë brenda rreth 6-7 kilogram tritol. Nëse është aktive është tepër e rrezikshme”, u shpreh banori. Ndërkohë thirrja për ekspertët është bërë edhe nga mediat në vend, por asnjë nuk ka shkuar në vendngjarje.
Discussion about this post