Një tjetër rast i prodhimit dhe furnizimit me mina të telekomanduara kundrejt pagesës, është konstatuar nga policia teksa në pranga ka rënë një 50- vjecar nga Kruja.
Arben Elezi, me banim në fshatin Larushk të Krujës u “fundos” nga një agjent i infiltruar i Policisë, i cili kishte porositur katër mina. Blutë bënë me dije së 50-vjecari u arrestua në flagrancë gjatë operacionit “Furnitori” të organizuar nga Policia e Durrësit, që u zhvilluar dje në zonën e Ishmit, në fshatin Shkafanë.
Në momentin e arrestimit, Policia gjeti në makinën e Elezit katër mina me telekomandë. “Policia e Durrësit godet një tjetër rast të veprimtarisë kriminale të prodhimit dhe shitjes së minave me telekomandë.
Është finalizuar me sukses operacioni policor i koduar ‘Furnitori’, i zhvilluar nga shërbimet e Komisariatit të Policisë Durrës. U arrestua në flagrancë Shtetasi Arben Elezi, 50 vjeç nga fshati Larushk, Krujë. Gjatë kontrollit u sekuestruan 4 mina me telekomandë, të cilat do shiteshin kundrejt çmimit 10.000 euro”, sqaroi Policia, e cila vazhdon hetimet për zbulimin e personave të tjerë të implikuar në këtë aktivitet kriminal.
