Minatori Muharrem Plaku, ndodhet i bllokuar prej 5 ditësh në minierën e Bulqizës, ndërkohë sot për herë të parë ka reaguar lidhur me këtë ngjarje të rëndë kryetari i bashkisë Bulqizë, Lefter Alla. Përmes një njoftimi në Facebook Alla shkruan se, lutet që ekipet e kërkimit të arrijnë sa më parë tek Muharremi dhe që ta nxjerrin atë shëndosh e mirë.
“I shqetësuar pafundësisht për situatën rreth kërkimeve të minatorit Muharrem Plaku. Çdo punë dhe angazhim i yni është për të mirën e qytetarëve tanë, por jeta e çdo banori, në qytet apo në fshat, kudo qoftë, vlen më shumë se gjithçka tjetër. Lutem që ekipet e kërkimit të arrijnë sa më parë tek Muharremi dhe ta nxjerrin atë shëndoshë e mirë, ta bashkojnë me familjen e të afërmit e tij, dhe t’i japin fund shqetësimit dhe ankthit që ka pushtuar të gjithë bashkëqytetarët tanë, e jo vetëm” shkruan Alla në postimin e tij”, shkruan ai.
Sakaq, bëhet me dije se ngjarja ka ndodhur me 15 shtator në një galeri të subjektit “KADURTEX”, në pronësi të vëllezërve Myfit dhe Kapllan Duriçi, ky i fundit ishte edhe administrator i kompanisë. Grupi i Avari Shpëtimit dhe specialistë të Repartit të Inspektim Shpëtim Minierave (RISHM) ndodhen në vendin e ngjarjes por sipas informacioneve sasia e materialit është shumë e madhe dhe është shumë e vështirë nxjerrja e minatorit.
