Një tjetër tragjedi ka goditur minierën e Bulqizës këtë të mërkurë, ku minatori Fari Veliu, 66 vjeç, humbi jetën gjatë orarit të punës. Aksidenti fatal ndodhi rreth orës 11:00, kur një masiv shkëmbor ra mbi të, duke i shkaktuar dëmtime të shumta trupore. Megjithëse u dërgua me urgjencë në spital, Veliu mbërriti atje pa shenja jete.
Ngjarja ndodhi në një galeri të kompanisë private “GERTI Shpk”, në pronësi të biznesmenit Jeton Dani. Ky emër është i njohur për aktivitetin minerar në zonë dhe ka lidhje politike me Partinë Socialiste, ndërsa djali i tij, Murat Dani, ishte kandidat për deputet në zgjedhjet e fundit.
Në një reagim këtë të enjte, policia ka njoftuar arrestimin e pesë punonjësve të stafit teknik të kompanisë: Nj. P., 46 vjeç, B. Ç., 68 vjeç, F. T., 61 vjeç, E. K., 35 vjeç dhe E. Xh., 51 vjeç. Ata dyshohen për neglizhencë në zbatimin e masave të sigurisë në punë, një veprim që dyshohet se çoi në vdekjen e minatorit.
Ky aksident tragjik vë sërish në qendër të vëmendjes kushtet e rrezikshme të punës në minierat e Bulqizës. Siguria për jetën e punëtorëve shpeshherë duket se neglizhohet, ndërsa mungesa e kontrollit mbi zbatimin e standardeve lëndore mbetet një problem serioz. Policia dhe organet kompetente po vazhdojnë hetimet për të zbardhur plotësisht rrethanat dhe për të vendosur përgjegjësit për këtë ngjarje fatale.
Discussion about this post