Teksa kanë kaluar 48 orë që nuk dihet asgjë për minatorin që mbeti në galerinë Bulqizë, ka reaguar Sindikata e Minatorëve të Bashkuar të Bulqizës. Ata akuzojnë strukturat shtetërore për angazhim qesharak në gjetjen dhe shpëtimin e Muharrem Plakut.
“Kanë kaluar më shumë se 48 orë nga momenti kur një masiv dheu ka zënë poshtë minatorin Muharrem Plaku në Bulqizë. Raportohet nëpër media sikur grupet e avari-shpëtimit janë duke bërë kërkime, por në fakt janë minatorët e tjerë, shokët e Muharremit, ata që po vazhdojnë kërkimet pa u lodhur”, thuhet në reagimin zyrtar.
Sindikata hedh akuza të drejtpërdrejta për organet shtetërore të cilat janë përqendruar në qeverinë dhe parlamentin e ri duke mos i kushtuar vëmendjen e duhur zhdukjes së minatorit.
“Shteti dhe mobilizimi i institucioneve shtetërore ka qenë qesharak, edhe pse kanë kaluar më shumë se dy ditë. E gjithë vëmendja është përqendruar te parlamenti i ri i padrejtësive të vjetra. Asnjë fjalë nuk kanë thënë për minatorin Muharrem Plaku. Bëjmë thirrje që shteti të kthejë sytë nga Bulqiza dhe të përqendrojë të gjitha forcat për nxjerrjen e shokut tonë nga nëntoka. Jeta jonë duhet të jetë më e rëndësishme se fitimi i pronarëve dhe pallavrat e politikanëve!”, përfundon reagimi.
Qarku i Dibrës, ku ndodhet miniera e Bulqizës, mban vendin e dytë për numrin e lartë të aksidenteve dhe të fataliteteve në vendin e punës pas Tiranës.
