Kromi vijon të jetë minerali me peshën më të madhe në vend për numrin e lejeve të dhëna për shfrytëzim, si dhe sasisë së prodhuar prej tyre.
Publikimi i përvitshëm i Agjencisë Kombëtare të Burimeve të Natyrës, si përmbledhje e aktivitetit në vitin paraardhës, tregon se në total u prodhuan 920 mijë tonë krom, kryesisht i orientuar për eksport.
“Shqipëria njihet për potencialin e saj të rëndësishëm në mineralin e kromit, krahasuar me vendet e tjera mesdhetare dhe ballkanike.
Në aktivitetin minerar të kromit, deri më 31.12.2023, janë 236 licenca aktive të shfrytëzimit. Aktivitetet prodhuese janë të përqendruara në qarkun e Bulqizës, me rreth 120 leje aktive, ndjekur nga Kukësi, Tropoja dhe Hasi.
Deri në fund të vitit 2023, 920769.98 tonë mineral kromi u prodhua në këtë degë të industrisë minerare kryesisht për eksport.
Depozitat kryesore të kromit ndodhen në Ofiolitet e zonës së Brezit Lindor, në drejtim Tropojë-Kukës-Bulqizë-Shebenik-Pogradec.
Në ofiolitet e brezit perëndimor është identifikuar më pak zhvillim në depozitat e kromit.
Nga këndvështrimi gjeologjik, ekzistojnë tre rajone kryesore ku gjendet xeherori i kromit:
– Rajoni Verilindor (Masivi Ultrabazik i Tropojës dhe Kukësit);
– Rajoni Qendror (Masivi Ultrabazik i Bulqizës dhe Lurës që është më i rëndësishmi);
– Rajoni Juglindor (Masivi Ultrabazik Shebenik-Pogradec)” thuhet në raport.
I njëjti publikim bën të ditur se në vitin 2023 ishin aktive 552 leje shfrytëzimi kryesisht të lokalizuara në Bulqizë, Krujë, Berat, Tiranë apo Librazhd. Përveç kromit që mban pjesën më të madhe të lejeve aktive, në vendin e dytë sipas publikimit të AKBN është guri gëlqeror më 137 leje./monitor
Discussion about this post