Ministri i Punëve të Jashtme të Maqedonisë së Veriut, Bujar Osmani, i cili njëherësh kryeson me presidencën e OSBE-së, ka paraqitur nëntë hapat e OSBE-së për shtensionimin e situatës në veri të Kosovës dhe pjesëmarrjen e serbëve në proceset demokratike brenda institucioneve të Kosovës.
Si hap i parë OSBE kërkon nga Kosova dhe Serbia të riafirmojnë përkushtimin e tyre për marrëveshjen e Ohrit dhe për aneksin e implementimit. Hapi i dytë është largimi i policisë speciale të Kosovës nga komunat në veri dhe reduktimi i forcave serbe në kufi me Kosovën.
Hapi i tretë sipas OSBE-së është që sigurinë në terren ta marrin në dorë policia e rregullt, e asistuar nga KFOR-i dhe EULEX-i. Anulimi i protestave, rikthimi i funksioneve dhe shërbimeve komunale si dhe rivendosja e jetës normale dhe lejimi i hyrjes së punonjësve komunalë është vendosur si hapi i katërt.
Tutje OSBE në hapat pesë, gjashtë e shtatë ka kërkuar që kryetarët e rinj të japin dorëheqje në verën e këtij viti për t’i krijuar hapësirë zgjedhjeve të parakohshme, e të cilat duhet të mbahen gjatë këtij viti me përkrahjen e OSBE-së, duke rritur besimin në radhët e komuniteteve.
Si hap të tetë OSBE ka premtuar se do të përfshijë rininë në programe dhe procese të pajtimit, derisa në hapin e fundit ky institucion ka thënë se do të përkrah zbatimin në mirëbesim të dispozitave të pajtimit dhe rifillimin e dialogut kuptimplotë./RTK
Discussion about this post