Ministri i Drejtësisë, Besfort Lamallari, zhvilloi sot një takim kortezie me ambasadorin e Italisë në Tiranë, Marco Alberti. Lajmin e bëri të ditur vetë ministri përmes një postimi në rrjetet sociale, ku theksoi rëndësinë e marrëdhënieve mes dy vendeve, veçanërisht në fushën e drejtësisë dhe shtetit të së drejtës.
“Diskutuam mbi bashkëpunimin e shkëlqyer mes Shqipërisë dhe Italisë në drejtësi dhe rëndësinë që ka ai për forcimin e shtetit të së drejtës,” shkroi Lamallari.
Gjatë takimit, të dy palët shprehën vullnetin dhe angazhimin për të thelluar më tej bashkëpunimin, sidomos në kontekstin e procesit të negociatave për anëtarësimin e Shqipërisë në Bashkimin Europian, me fokus në Kapitullin 23: “Gjyqësori dhe të Drejtat Themelore”.
Ministri Lamallari gjithashtu nënvizoi mbështetjen e Italisë për nismat e Ministrisë së Drejtësisë, të cilat zhvillohen në përputhje me vizionin e qeverisë shqiptare për “Shqipërinë 2030” – një agjendë reformash që synon forcimin e institucioneve dhe përshpejtimin e integrimit europian.
Takimi u vlerësua si një hap i rëndësishëm drejt thellimit të partneritetit strategjik mes Shqipërisë dhe Italisë në fushën e drejtësisë dhe sundimit të ligjit.
Discussion about this post