Shqipëria dhe Shtetet e Bashkuara vijojnë të forcojnë bashkëpunimin në fushën e sigurisë dhe mbrojtjes.
Ministri i Mbrojtjes, Pirro Vëngu priti sot në një takim mirëseardhjeje të ngarkuarën me punë në Ambasadën e SHBA-së në Tiranë, Nancy VanHorn, me të cilën nënshkroi një memorandum për vendosjen e këshilltarit të Planifikimit Strategjik pranë Ministrisë së Mbrojtjes.
Vëngu theksoi se “ai do t’i bashkohet katër këshilltarëve të tjerë amerikanë që ndërveprojnë në baza ditore me stafin civil dhe ushtarak shqiptar, në modernizim, logjistikë, personel e rekrutim si dhe siguri kibernetike”.
“Projektet me impakt strategjik të shumëfishtë për vendin, siç është baza autonome detare e Porto Romanos, rijetëzimi i industrisë ushtarake në vend, si dhe angazhimet politike dhe financiare përkundrejt NATO-s, në fokus të vazhdueshëm të partneriteti tonë strategjik me SHBA, duke kontribuar në forcimin e sigurisë kombëtare dhe stabilitetit rajonal”, u shpreh ministri.
Takimi në fjalë është zbardhur edhe nga Ambasada Amerikane në vendin tonë.
“E Ngarkuara me Punë Nancy VanHorn u takua dje me Ministrin e Mbrojtjes Pirro Vëngu për të ritheksuar marrëdhëniet e forta mes Shteteve të Bashkuara dhe Shqipërisë në fushën e mbrojtjes. Ata diskutuan mbi kontributet e Shqipërisë për sigurinë dhe stabilitetin rajonal dhe botëror.
Znj. VanHorn falënderoi Shqipërinë për mbështetjen e saj thelbësore në punën e përbashkët, në koordinim me aleatët dhe partnerët e tjerë të NATO-s, për të siguruar të ardhmen e Ukrainës si një komb sovran, i lirë dhe i begatë”, thuhet në reagimin e ambasadës së SHBA-së në vendin tonë.
gijotina.com/
Discussion about this post